Manolotra ny fiainany ny Tompo
Mofonaina anio: Asabotsy, faha 21 Aprily 2018
Manolotra ny fiainany ny Tompo
Jaona 15.9-16
9 Tahaka ny nitiavan'ny Ray Ahy no nitiavako anareo; tomoera amin'ny fitiavako ianareo. 10 Raha mitandrina ny didiko ianareo, dia hitoetra amin'ny fitiavako, tahaka ny nitandremako ny didin'ny Raiko sy ny itoerako amin'ny fitiavany. 11 Izany zavatra izany dia efa nolazaiko taminareo, mba ho ao aminareo ny fifaliako, ka ho tanteraka ny fifalianareo. 12 Izao no didiko, dia ny mba hifankatiavanareo tahaka ny nitiavako anareo. 13 Tsy misy manana fitiavana lehibe noho izao, dia ny manolotra ny ainy hamonjy ny sakaizany. 14 Hianareo no sakaizako, raha manao araka izay andidiako anareo. 15 Tsy hataoko hoe mpanompo intsony ianareo, fa ny mpanompo tsy mahalala izay ataon'ny tompony; fa efa nataoko hoe sakaiza ianareo, satria izay rehetra reko tamin'ny Raiko no nambarako taminareo. 16 Tsy ianareo no nifidy Ahy, fa Izaho no nifidy anareo ka nanendry anareo mba handeha sy hamoa, ary mba haharetan'ny vokatrareo, mba homen'ny Ray anareo izay rehetra hangatahinareo amin'ny anarako na inona na inona.Manolotra ny fiainany ny Tompo
Jaona 15.9-16
Mitoetra amin’ny fitiavana
1-Ao amin’i Jesoa
Efa tia antsika Andriamanitra , ka nanolotra ny zavatra rehetra . Fitiavana voalohany sy faratampony ny Azy, ka tonga hatramin’ny fanolorany ny ainy mihitsy aza, « tsy misy manana fitiavana lehibe noho izao , dia ny manolotra ny ainy hamonjy ny sakaizany « (and 13). Notanterahin’i Jesoa izany ka tonga fahafahana miezinezina , nanafaka antsika tamin’ny fanandevozan’ny ota sy ny fahafatesana. Io fitiavan’i Jesoa io no fenitra fara-tampon’ny azon’ny mino rehetra alaina tahaka.
2-Amin’ny didiny
Fiainana ny fifankatiavana no didiny. Tsy hoe: fepetran’ny fitiavan’ Andriamanitra antsika akory no hilazany hoe: »ianareo no sakaizako raha manao araka izay andidiako, anareo »and14, fa tena tombom-pitia omen’ Andriamanitra ny mpino. Efa tia Izy ary tia tsy misy fepetra . Koa tiany isika hiaina amin’ny fitiavana tahaka Azy. Tsy fitiavana baikon’ny rafitra toy ny Tompo sy mpanompo , fa izay iasan’ny fahasoavana toy ny mpisakaiza. Rehefa izany , dia ny fiainany manontolo mihitsy no atolony ho antsika .
Fanontaniana:
Birao Sekoly Alahady FOIBE FJKM