Mihainoa ny Tenin’ny Tompo
Mofonaina anio: Alatsinainy, faha 26 Febroary 2018
Mihainoa ny Tenin'ny Tompo
Asan'ny Apostoly 13.44-52
44 Ary nony tamin'ny Sabata manaraka, dia saiky tafangona avokoa ny tao an-tanàna hihaino ny tenin'Andriamanitra. 45 Nefa ny Jiosy kosa, raha nahita ny vahoaka betsaka, dia feno fialonana ka nanohitra ny teny nolazain'i Paoly, sady niteny ratsy*. [* Gr. nanao blasfemia, izahao Mat. 9.3] 46 Ary Paoly sy Barnabasy dia niteny tamin'ny fahasahiana ka nanao hoe: Hianareo no tsy maintsy nitoriana ny tenin'Andriamanitra aloha; fa rehefa mandà izany ianareo ka manao ny tenanareo ho tsy miendrika hahazo fiainana mandrakizay, dia indro, mitodika mankany amin'ny jentilisa izahay; 47 fa izao no nandidian'ny Tompo anay: Efa nanendry Anao ho fahazavan'ny jentilisa Aho, Mba ho famonjena hatrany amin'ny faran'ny tany Hianao (Isa. 49. 6). 48 Ary rehefa nandre izany ny jentilisa, dia faly izy ka nankalaza ny tenin'Andriamanitra*; ary izay voalahatra ho amin'ny fiainana mandrakizay dia nino. [* Na: ny tenin'ny Tompo] 49 Ary ny tenin'ny Tompo dia naely eran'izany tany rehetra izany. 50 Fa ny Jiosy nampitaitra ny vehivavy manan-kaja izay nivavaka sy ny lehibe tao an-tanàna, dia nahatonga fanenjehana tamin'i Paoly sy Barnabasy ireny ka nandroaka azy niala tamin'ny taniny. 51 Fa izy roa lahy kosa nanintsana ny vovoka tamin'ny tongony hiampanga ireo, dia nankany Ikonioma. 52 Ary dia feno fifaliana sy ny Fanahy Masina ny mpianatra.Mihainoa ny Tenin’ny Tompo
Asan’ny Apostoly 13.44-52
Ny Filazantsaran’i Jesoa Kristy
1-Natao ho an’ny olona rehetra
Mitombo hatrany ireo sokajin’olona nihaino ny fitoriana ny Filazantsara nataon’i Paoly sy Barnabasy . Tsy ireo Jiosy ihany fa teo ny jentilisa izay tena liana tokoa . Rehefa nahita izany ny Jiosy dia velom-pialonana , nanohitra ary nitady ny fomba rehetra hanakorontanana mba hahatonga fanenjehana ireto mpitory ny Filazantsara . Tsy nampihemotra ny ny mpitory anefa izany fa feno fahasahiana hatrany izy ireo nanambara ny andraikitra nanirahana azy dia ny hitondra fanazavana any amin’ny jentilisa (and47). Tian’ Andriamanitra loatra ianao . Koa maniraka ny mpanompony hitory ny teniny aminao Izy. Mahaiza mihaino ny Tenin’ Andriamanitra.
2-Mitondra fifaliana ho an’izay mandray
Ireo Jiosy tsy nihaino ny Tenin’ Andriamanitra dia feno fialonana sady nikotrika fanakorontanana. Na dia teo aza izany sy ny fanoherana nataon’ireo mpitarika tao amin’ny synagoga dia tsy tana fa nandroso hatrany ny asa fitoriana nataon’i Paoly sy Barnabasy. Niavaka kosa ny fiainan’ireo nihaino sy nandray ny Tenin’Andriamanitra .
« faly izy ka nankalaza ny Tenin’ Andriamanitra , ary voalahatra ho amin’ny fiainana mandrakizay izay nino« (and 49). Meteza isika mba hihaino sy handray marina ny Tenin’ Andriamanitra , dia ho resy ny fialonana ka hanana fiainam-pifaliana mandrakariva isika satria azo antoka ny fiainana mandrakizay omen’ny Tompo antsika mpino Azy.
Fanontaniana:
Birao Sekoly Alahady FOIBE FJKM