Mihainoa ny Tenin’ ny Tompo
Mofonaina anio: Asabotsy, faha 17 Febroary 2018
Mihainoa ny Tenin' ny Tompo
Eksodosy 23.20-23
20 [Ny niantohan'Andriamanitra hiaro ny Zanak'Isiraely sy hamponina azy soa aman-tsara ao amin'ny tany Kanana] Indro, Izaho maniraka Anjely eo alohanao hiaro anao any an-dalana sy hitondra anao ho any amin'ny fitoerana izay namboariko. 21 Mitandrema eo anatrehany, ka mihainoa ny feony, ary aza mampahatezitra Azy; fa tsy hamela ny fahotanareo Izy; fa ny anarako no ao aminy. 22 Fa raha hihaino ny feony tokoa ianao ka hanao izay rehetra lazaiko, dia ho fahavalon'ny fahavalonao sy ho rafin'ny rafinao Aho. 23 Fa handeha eo alohanao ny Anjeliko ka hitondra anao any amin'ny Amorita sy ny Hetita sy ny Perizita sy ny Kananita sy ny Hivita ary ny Jebosita; ary dia hofongorako ireny,
Mihainoa ny Tenin’ ny Tompo
Eksodosy 23.20-23
Ilay Andriamanitra mitana ny teny nomeny
1-Manome lova ny olony
Nampanantena Andriamanitra fa ny tany Kanana no nomeny ho lova ho an’ny Zanak’Israely . Koa mba hahatanteraka izany dia manome toky Izy fa maniraka ny anjeliny ho mpitari-dàlana , hanokatra nv ny làlana izorana , eny hiady raha misy fahavalo manakatsakana eny an-dàlana . Tsarovy fa efa naniraka an’i Jesoa Kristy hanokatra ny làlana handovanao ny fanjakany Andriamanitra . Matokia Azy .
2-Miteny mandrakariva
Mialoha làlana ilay anjely irak’ Andriamanitra . Miteny manome toromarika mandrakariva ho an’ny Zanak’Israely Izy mba ho lavorary ny dia ho any amin’ ny tany Kanana . Tsy maintsy mihaino sy mankato ny teny ambarany ny olona . Ny fandavana ny teny ataony dia toy ny fandavana an’ Andriamanitra. Miteny aminao isanandro Andriamanitra . Tiany handova ny fanjakany ianao . Meteza hankato izay lazainy aminao .
3-Miady ho an’ny olony
Rehefa mihaino ka mankato izay lazain’ Andriamanitra amin’ ’ilay anjely ny olona dia hiaro sy hiady ho azy ireo amin’ny hetraketraky ny fahavalo mandrakariva ilay anjely . Fanomezan-toky izany fa tsy miady irery ny olony fa eo Andriamanitra miady ka mampandresy . Tsarovy tsy irery ianao eo am-piatrehana ny fiainana . Na dia misy aza ny fahavalo manakana ny dianao , ankatoavy ny Tenin’ Andriamanitra dia ho mpandresy ianao .
Fanontaniana :
Inona no fitaovana mahomby omen’ Andriamanitra anao mba handresena ny asan’ny ratsy ?
Birao Sekoly Alahady FOIBE FJKM