Miandry ny Tompo ny vavolombelona mino
Mofonaina anio: Talata, faha 21 Novambra 2017
Miandry ny Tompo ny vavolombelona mino
Lioka 21.25-28
25 Ary hisy famantarana eo amin'ny masoandro sy ny volana ary ny kintana, ary et? ambonin'ny tany dia hisy fahorian'ny firenena amin'ny fahaverezan-kevitra noho ny firohondrohon'ny ranomasina sy ny fanonjany, 26 ka ho reraka ny fon*'ny olona noho ny fahatahorany sy ny fiandrasany izay zavatra ho tonga ambonin'ny tany; fa ny herin'ny lanitra dia hohozongozonina.[* Na: ka hisy ho faty aza] 27 Ary amin'izany andro izany dia hahita ny Zanak'olona avy eo amin'ny rahona amin-kery sy voninahitra lehibe izy. 28 Ary raha vao miandoha izany zavatra izany dia miandrandrà, ka asandrato ny lohanareo; fa manakaiky ny fanavotana anareo.Miandry ny Tompo ny vavolombelona mino
Lioka 21.25-28
Ary amin’izany andro izany dia hahita ny Zanak’olona avy eo amin’ny rahona amin-kery sy Voninahitra lehibe izy » and27
Ny fiavin’ny Zanak’olona dia
1-Amin’ny famantarana lehibe
Famantarana lehibe avy any an-danitra no hiseho (and11) ary i Matio sy i Marka no manazava kokoa fa ny masoandro hohamaizinina ny volana tsy hahazava ary ny kintana hiraraka avy any an-danitra . Fanamafisana ny efa voalazan’ny faminaniana tany aloha tany (Isa 13.9-10; Joe 2.10) , ary ho tanteraka araka ny voalazan’ny fahitana ao amin’ny Apo 6.12-13 . Fahariana vaovao eo amin’ny tany sy ny lanitra no hiseho amin’ny fiavian’i Kristy eny amin’ny rahon’ny lanitra . Isika mpino ihany koa dia hiatrika izany fanavaozana lehibe izany .
2-Amin’ny hery sy ny Voninahitra lehibe
Ny rahona no hisolo ny kalesy fitondran’ny mpanjaka (Sal 104.3). Maneho ny fanatrehan’ Andriamanitra ny vahoakany ny rahona tao amin’ny Testamenta taloha. Amin-kery sy voninahitra lehibe no hisehoan’i Kristy manoloana izany rehetra izany , ka ny firenena sy ny fokom-pirenena rehetra ambonin’ny tany na ny mino na tsia dia hiondrika eo anatrehany avokoa (Dan 7.13-14). Ho avy Izy hanavotra ny olony sy hanarina ny tany rava ary hametraka ny fanjakany , satria « ny fanjakan’izao tontolo izao dia efa lasan’ny Tompontsika sy ny Kristiny , ary Izy no hanaka mandrakizay mandrakizay » Apo 11.15
Fanontaniana:
Nahoana ny olona no matahotra ny fiavian’ny Tompo ?
Birao Sekoly Alahady FOIBE FJKM