Mahery vavaka ny vavolombelona marina
Mofonaina anio: Alakamisy, faha 26 Oktobra 2017
Mahery vavaka ny vavolombelona marina
Ezra 10.1-4
1 Ary raha mbola nivavaka sy nitsotra Ezra sady nitomany sy niankohoka teo anoloan'ny tranon'Andriamanitra, dia nivory teo aminy ny olona maro be avy tamin'ny Isiraely, na lehilahy, na vehivavy mbamin'ny ankizy madinika; fa nitomany mafy dia mafy koa ny olona. 2 Dia namaly Sekania, zanak'i Jehiela, isan'ny taranak'i Elama, ka nanao tamin'i Ezra hoe: Izahay efa nanao izay mahadiso amin'Andriamanitsika, fa efa naka vehivavy hafa firenena avy tamin'ny tompon-tany ho vadinay; nefa mbola misy fanantenana ihany ho an'ny Isiraely ny amin'izany zavatra izany. 3 Koa aoka izahay hanao fanekena amin'Andriamanitsika hisaotra ny vady rehetra sy hanary izay naterany araka ny anatra nataonao, tompokolahy, sy izay mangovitra noho ny didin'Andriamanitsika; ary aoka hatao araka ny lalàna izany. 4 Mitsangàna, fa adidinao izany; ary indreto koa izahay eto aminao; dia matokia tsara, ka ataovy izany.Mahery vavaka ny vavolombelona marina
Ezra 10.1-4
Fanadiovana ny firenena
1-Mivavaka sy mitsotra amin’ Andriamanitra
Mivavaka araka ny fanambaran’ny Soratra masina i Ezra mpisorona . Rehefa tafaverina avy amin’ny fahababoana avy tany Babylona ny Jiosy dia nifangaro be ny mponina tany Jerosalema . Maro ny mpisorona sy ny lehilahy no efa nanambady hafa firenena , izay mifanohitra amin’ny lalàn’i Mosesy . Manarina ny fireneny ho Israely vaovao ny irak’ Andriamanitra , ka mampiverina ny olona amin’ny Tenin’ Andriamanitra sy ny fivavahana ary ny fibebahana marina . Nodiovina sy nampifanarahana tamin’ny Tenin’ Andriamanitra ny fanambadiana . Izany no nanampian’i Sekania an’i Ezra mba tsy hiala amin’ny marina : fisarahana ny vady hafa firenena (and2) .
2-Mampiombona ny vavaka
Mampiverina ho amin’ny Tenin’ Andriamanitra ny vavaka . Niverina nanao fanekena tamin’ Andriamanitra indray ny Joda (and3). Mampiray ny firenena manontolo ny amin’ Andriamanitra iray . Antsoina ho matahotra an’ Andriamanitra ny Jiosy avy amin’ny fahababoana dia ireo mangovitra noho ny didin’ Andriamanitra (and3) . Fanitsiam-pivavahana mametraka ny Tenin’ Andriamanitra ho ambony noho ny hevitra sosialy sy fiaraha-monina no nataon’i Ezra . Tomponandraikitra voalohany amin’ny fanatanterahana ny Tenin’ Andriamanitra ny mpisorona . Ho tahaka izany koa ny mpitarika eo amin’ny fiangonana ankehitriny .
Fanontaniana:
Birao Sekoly Alahady FOIBE FJKM