Mahery vavaka ny vavolombelona marina
Mofonaina anio: Alatsinainy, faha 02 Oktobra 2017
Mahery vavaka ny vavolombelona marina
Filemona 1,8 - 21
8 Koa na dia manana fahasahiana be ao amin'i Kristy handidy anao amin'izay mendrika aza aho, 9 nefa noho ny fitiavana, izaho Paoly, izay efa anti-panahy* sady mpifatotra an'i Kristy Jesosy koa ankehitriny, dia miangavy aminao. [* Na: ambasadôra] 10 Eny, miangavy aminao aho ny amin'ny zanako, izay naterako teto amin'ny fifatorako, dia Onesimosy*, [* Onesimosy = Mahasoa] 11 ilay tsy nahasoa anao fahiny, nefa ankehitriny mahasoa antsika, dia ianao sy izaho; 12 izay nampodiko indray, dia ilay sombin'ny aiko; 13 saiky nohazoniko tat? amiko izy hanompo ahy hisolo anao eto amin'ny fifatorako noho ny filazantsara; 14 nefa raha tsy nahalala izay hevitrao aho aloha, dia tsy ta-hanao na inona na inona, mba tsy ho toy ny amin'ny fanerena ny soa ataonao, fa amin'ny sitrapo. 15 Fa izany angaha no nialany vetivety, dia ny mba hanananao azy mandrakizay, 16 tsy toy ny andevo intsony anefa, fa efa mihoatra noho ny andevo, dia rahalahy malala, indrindra fa ho ahy, mainka fa ho anao, na amin'ny nofo, na amin'ny Tompo. 17 Koa raha ataonao ho namanao aho, dia raiso toa ahy izy. 18 Nefa raha nanao izay tsy marina taminao izy, na mitrosa, dia ataovy ho ahy izany; 19 izaho Paoly no manoratra izany amin'ny tanako, izaho no handoa izany - nefa tsy lazaiko aminao fa mitrosa ny tenanao amiko aza ianao. 20 Eny, ry rahalahy, aoka hanana fifaliana avy aminao ao amin'ny Tompo aho; velombelomy ny foko ao amin'i Kristy. 21 Noho ny fahatokiako fa hanaiky ianao no anoratako aminao, ka fantatro fa hanao mihoatra noho izay lazaiko aza ianao.Mahery vavaka ny vavolombelona marina
Filemona 8.21
Mitarika ny saina handinika ny fifandraisana amin’ny Tompo izao miseho zao . Nandevozin’ny fahotana isika ka rehefa afa-nandositra tao dia noraisiny sy novolavolainy tsy ho andevo fa tena zanaka . Ny fifamatoram-piainana amin’ny Tompo no mivoitra eto .
1-Manafaka amin’ny faharatsiana
« Eny miangavy aminao aho ny amin’ny zanako » (and10) . Ny fangatahan’i Paoly tamin’i Filemona dia mitovy endrika amin’ny fangatahan’i Jesoa teo amin’ Andriamanitra Ray (Jaona 17) . Ny mba handraisana ilay efa nania mba hiara-miasa ka ho tena zanaka mahasoa . Jesoa Kristy tokoa no miangavy mba hahazoantsika fitoerana miaraka Aminy . Tahaka ny nanafahan’i Paoly an’i Onesimosy tamin’ny maha-andevo azy no fanafahan’i Jesoa Kristy antsika ankehitriny . Aoka ho mendrika izany isika ka hiala amin’ny ratsy sady hazoto hanao ny tsara .
2-Manolo toerana antsika
« Koa raha ataonao ho namanao aho , dia raiso toa ahy izy » (and17). Zava-dehibe amin’ny olona nitondra fanamiana ny olona nampiany . Mpamonjy antsika i Jesoa Kristy ka tsy mahafoy antsika olona novonjeny .Eny , ny Rany mihitsy no nomeny hisoloana antsika teo amin’ny hazo fijaliana . Tonga olona afaka isika ary mbola tiany hiray toerana Aminy amin’ny fandovana ny fanjakan’ Andriamanitra . Mirosoa àry ho vita fihavanana Aminy isika ka hanana ny fifamatoram-piainana amin’ Andriamanitra isanandro . Izany no fivavahana marina eo anatrehany .
Fanontaniana:
Ahoana ny fahatsapanao ny fisoloana sy ny fanafahan’i Jesoa Kristy anao teo amin’ny hazo fijaliana ?
Birao Sekoly Alahady FOIBE FJKM