Manaiky ho vavolombelon’ny Tompo ny irany
Mofonaina anio: Alarobia, faha 19 Jolay 2017
Manaiky ho vavolombelon'ny Tompo ny irany
Lioka 16.9-13
9 Ary hoy Izaho aminareo: Aoka ny mamôna tsy marina ho entinareo mahazo sakaiza, mba horaisin'ireo ho any amin'ny fonenana mandrakizay ianareo, rehefa lany izany. 10 Ary izay mahatoky amin'ny kely indrindra dia mahatoky koa amin'ny be; ary izay tsy marina amin'ny kely indrindra dia tsy marina koa amin'ny be. 11 Koa raha tsy mahatoky amin'ny mamôna tsy marina ianareo, iza no hatoky anareo ny amin'ny tena harena? 12 Ary raha tsy mahatoky amin'izay an'olona ianareo, iza no hanome anareo izay anareo? 13 Tsy misy mpanompo mahay manompo tompo roa; fa ny anankiray ho halany, ary anankiray ho tiany; na ny anankiray hombany, ary ny anankiray hohamavoiny. Tsy mahay manompo an'Andriamanitra sy mamôna ianareo.Manaiky ho vavolombelon’ny Tompo ny irany
Lioka 16.9-13
Iraka mahatoky
1-Amin’ny kely indrindra
Mila iraka mahatoky i Jesoa ka manafatrafatra ny mpianatra mba ho azo hitokisana amin’ny zavatra kely indrindra . Zava-dehibe no miandry ny olona irahina hampandroso ny fanjakan’ Andriamanitra. Raha tsy mahatoky amin’ny fitantanana ny haren’ny tany izy dia tsy ho azo irahina sy anankinana ny fitantanana ny harena sy ny fananana ao amin’ny fanjakan’ Andriamanitra . Toetran’ Andriamanitra ny mahatoky araka ny hitantsika tamin’ny mofonaina nandritra ny volana Janoary . Tiany hanana izany toetra mahatoky izany koa isika izay manaiky ho irany.
2-Amin’ny fanompoana an’ Andriamanitra.
Mila iraka tokam-po amin’ny fanompoana Azy i Jesoa . Tsy afaka ny hisahana zavatra roa indray miaraka avy hatrany ny olona ka izany no nitenenan’ny Tompo fa tsy afaka ny ho sady hanompo ny vola aman-karena isika no hanompo an’ Andriamanitra koa. Ny iraka manaiky ho vavolombelon’ny Tompo . Noho izany dia manao ho laharam-pahamehana ny fanompoana an’ Andriamanitra sy ny iraka ampanaovin’ny Tompo azy .
Fanontaniana:
Birao Sekoly Alahady FOIBE FJKM