STK SP 29 / Lozam-pifamoivozana
« Isaorana anie Andriamanitra , Rain’i Jesoa Kristy Tompontsika , Rain’ny famindrampo sady Andriamanitry ny fampiononana rehetra , izay nampionona anay amin’ny fahorianay rehetra mba hahaizanay mampionona izay rehetra mitondra fahoriana kosa amin’ny fampiononana izay ampiononan’ Andriamanitra anay . » 2 Kor 1.3
Izany teny avy ao amin’ny Soratra masina izany no hitaterana eto ny vaovao izay nitranga tao amin’ny Commune MORARANO Ambohitromby , 20 Km hiditra an’ Ankazobe, ny Alatsinainy 31 Jolay 2017 , tokotokony tamin’ny 12 ora alina . Fiara lehibe , misy rihana no nitondra ireo STK miisa any amin’ny 100 mahery , avy any amin’ny Synodamparitany Mandridrano Mpiambina (SP 29) Faritr’i Soavinandrina Itasy , hamonjy ny Fihaonambe Nasionalin’ny Sampana Tanora Kristiana FJKM izay hatao ao Mahajanga ny 01 -06 Aogositra 2017 .
Teo am-piakarana iny indrindra no tsy nahatafiditra vitesse ny mpamily , ka nihemotra nihemotra , ary tsy tana fa nivadika tany amin’ny hantsana hatrany amin’ny 15 m any ho any ilay fiara lehibe . Voalazan’ireo traboina tafavoaka ny fiara ,fa nivadika hatrany amin’ny inefatra ny fiara vao tafajanona , rehefa izay dia nirehitra sady nahamay ny tanety manodidina ihany koa .
Ny tarehimarika ofisialy voaray dia miisa 19 no maty ary 87 no isan’ireo maratra nentina notsaboina tao amin’ny Hopitaly HJRA Ampefiloha , Antananarivo . Misy ireo may , voatsindry any amin’ny farany ambany .
Lehibe sady mahatsiravina ny fahavoazana satria marihana fa mpihavana ny ankamaroan’ny mpandeha hihazo izany Fihaonambe izany . Ao ny sady maty vady no maty zanaka , ao ny tsy mbola nahita ny havany satria nisy ny may kila forehatra , tsy misy hahalalana azy intsony , ary dia voatery notsofaina ny vatan’ilay fiara hisokirana ny sisa taolana .
Eto am-pamaranana izao tatitra izao . Mampieritreritra lalina ny lohahevitry ny Perikopa amin’ity volana AOGOSITRA ity manao hoe : « Mandresy fijaliana ny vavolombelon’ny Tompo » . Ny Fanahy masina irery ihany no afaka mampionona amin’izao fahoriana mavesatra dia mavesatra izao . Izy no hangatahantsika hampahery , hampitraka , ka tsy hanariana ny finoana . Fivoriana masina no niomanan’ireo mpandeha ireto handehanana , dia ny Fihaonamben’ny STK Nasionaly . Andriamanitra irery ihany no mahalala ny anton’izao toe-javatra izao . Tsy misy azo atao afa-tsy ny mifampivavaka sy mifampahery mba hahazakana izany amin’ny fanekena tanteraka ny fitondrany izay saro-pantarina amintsika zanak’olombelona .
« Mahereza ary aoka hatanjaka ny fonareo , dia ianareo rehetra izay miandry ny Tompo . Aza matahotra ianao , fa momba anao Aho ary aza miherikerika foana fa Izaho no Andriamanitrao , mampahery anao Aho sady mamonjy anao , eny mitantana anao amin’ny tànana ankavan’ny fahamarinako Aho » Salamo 31.24 / Isaia 41.10
Numero M-VOLA avy @ Foibe FJKM handefasana ny fanampiana ho an’ireo STK sy SAMPATI FJKM
Rehefa lasa amin’ io ny fanampianareo dia afaka manoratra SMS manamafy izany amin’ ity ianareo mba hahafahana manamarina izany: 034 96 209 32.